नागपूर दि. 2 :- उमरेडच्या नागरिकांची अनेक दिवसाची मागणी आज पूर्ण झाली असली तरी पक्षकार, वकिल व न्यायाधीश या तीन घटकांनी सर्व प्रलंबीत प्रकरणे वेळेत निकाली काढण्याचा प्रयत्न केला तर खऱ्या अर्थाने दिवाणी न्यायालय वरिष्ठ स्तर सुरु झाल्याचे सार्थक होईल, असे प्रतिपादन उच्च न्यायालय मुंबई, नागपूर व पालक न्यायमुर्ती आर. बी. देव यांनी आज केले.
उमरेड येथे दिवाणी व फौजदारी न्यायालय तहसिल परिसरात आज दिवाणी न्यायालय वरिष्ठ स्तर नव्याने निर्माण करण्यात आले असून या न्यायालयाचे न्यायमूर्ती आर. बी. देव यांच्या हस्ते कोनशिला अनावरण व दीप प्रज्वलन करुन उद्घाटन झाले. यावेळी व्यासपीठावर प्रमुख जिल्हा व सत्र न्यायाधीश नागपूर व्ही. डी. डोंगरे, दिवाणी न्यायाधीश वरिष्ठ स्तर एस. के. फोकमारे , उमरेड तालुका वकील संघाचे अध्यक्ष ॲड. सी. जी. अखंडे उपस्थित होते.
न्यामूर्ती देव म्हणाले, उमरेड ,भिवापूर व कुही परिसरातील कास्तकार व गरीब माणसाला वेळेवर न्याय मिळाला पाहिजे. यासाठी पक्षकार व वकील यांनी न्यायालयांना सहकार्य करावे. वकीलांनी पक्षकारांना कमीत कमी वेळात न्याय मिळण्यासाठी आपले म्हणणे न्यायालयात मांडावे अशा सूचनाही त्यांनी यावेळी केल्या.
अध्यक्षीय भाषणात प्रमुख जिल्हा व सत्र न्यायाधीश व्ही. डी. डोंगरे म्हणाले, उमरेड, भिवापूर व कुही या तीन तालुक्यातील वकील संघाने सातत्याने प्रयत्न केल्यामुळे आज उमरेड या ठिकाणी वरिष्ठ स्तर न्यायालय नव्याने सुरु होत आहे. ही उमरेड वासियांसाठी आनंदाची बाब आहे. ते पुढे म्हणाले की, उमरेड न्यायालयात साधारण 2100 वेगवेगळया विषयांचे प्रकरणे प्रलंबीत असून यामुळे या न्यायालयावर मोठा भार असून पक्षकारांचे हित बघून लवकरात लवकर प्रकरणांचा निपटारा करावा यासाठी वकील मंडळींनी सहकार्य करावे, असेही त्यांनी यावेळी सांगितले.
ते पुढे म्हणाले की, संगणकीकरणामुळे न्यायालयाच्या कामकाजात मोठा बदल झाला असून त्याचा फायदा न्याय प्रक्रिया जलद होण्यासाठी होतो असेही त्यांनी यावेळी सांगितले.
आपल्या प्रास्ताविकात उमरेड तालुका वकील संघाचे अध्यक्ष ॲड. सी. जी. अखंडे यांनी सांगितले की, सातत्याने पाठपुरावा व नागरिकांच्या सहकार्यामुळे आज नव्याने वरिष्ठ स्तर न्यायालय स्थापन झाले. ही उमरेडच्या जनतेला एक भेट आहे, असेही त्यांनी सांगितले.
आभार प्रदर्शन दिवाणी न्यायालय वरिष्ठस्तर दिवाणी न्यायाधीश एस. के. फोकमारे यांनी केले.
यावेळी उमरेडचे आमदार सुधीर पारवे, नगराध्यक्षा विजयालक्ष्मी भदोरिया, जिल्हा न्यायाधीश व्ही. पी. गायकवाड, ओ. पी. जयस्वाल, एन. एम. जमादार, न्यायाधीश एस. व्ही. देशमुख, न्यायाधीश ए. व्ही. पंडीत, डी. बी. गुठ्ठे, सरकारी वकील नितीन तेलगोटे, परिसरातील नागरिक, अधिकारी, कर्मचारी मोठ्या संख्येने उपस्थित होते.
No comments:
Post a Comment