मसकऱ्या गणेशोत्सव नागपूरची वैभवशाली सांस्कृतिक ओळख

मसकऱ्या गणेशोत्सव नागपूरची वैभवशाली सांस्कृतिक ओळख -मुख्यमंत्री देवेंद्र फडणवीस *मसकऱ्या गणपतीचे घेतले दर्शन* नागपूर, दि. ४ - नागपूरच्या धार्मिक आणि सांस्कृतिक परंपरेत मसकऱ्या गणेशोत्सवाला विशेष महत्त्व आहे. नागपूरची जी अनेक वैशिष्ट्ये आहेत, त्यापैकी एक हा गणेशोत्सव आहे. ही ऐतिहासिक व वैशिष्ट्यपूर्ण परंपरा शेकडो वर्षांपासून भोसले घराण्याने अतिशय आदराने जपली आहे. हा गणेशोत्सव केवळ एक धार्मिक उत्सव नसून नागपूर शहराची एक अत्यंत वैशिष्ट्यपूर्ण आणि वैभवशाली सांस्कृतिक ओळख बनला आहे, असे प्रतिपादन मुख्यमंत्री देवेंद्र फडणवीस यांनी आज येथे केले. महाल येथील सीनिअर भोसला पॅलेस येथे श्री महाराजा ऑफ नागपूर ट्रस्टच्या ऐतिहासिक 'मसकऱ्या गणपती'च्या दर्शन प्रसंगी ते बोलत होते. यावेळी श्रीमंत राजे रघुजी महाराज भोसले (पंचम), राजे मुधोजी भोसले आणि राजे जयसिंह भोसले आदी उपस्थित होते. सीनिअर भोसला पॅलेस येथे आगमन होताच मुख्यमंत्री श्री. फडणवीस यांनी गणरायाचे दर्शन घेतले. याप्रसंगी नागपूरच्या भोसले घराण्याच्या वतीने त्यांचा सत्कार करण्यात आला. आपल्या भाषणात पुढे बोलताना मुख्यमंत्री श्री. फडणवीस म्हणाले की, नागपूरकर भोसले घराण्याचा इतिहास अत्यंत जाज्वल्य आणि देदीप्यमान राहिला असून, पूर्वेकडे हिंदवी स्वराज्याचा विस्तार करण्यात या घराण्याचे महत्त्वपूर्ण योगदान राहिले आहे. आजच्या काळातही सर्व ऐतिहासिक प्रथा आणि परंपरा मुधोजी राजे भोसले यांच्या सक्षम नेतृत्वाखाली अतिशय उत्साहात पार पडत आहेत हे कौतुकास्पद असल्याचे ते म्हणाले. नागपूरच्या धार्मिक आणि सांस्कृतिक परंपरेत मसकऱ्या गणेशोत्सवाला विशेष महत्त्व आहे. मसकऱ्या गणपतीला ‘हडपक्या गणपती’ असेही म्हटले जाते. भाद्रपदातील सार्वजनिक गणेशोत्सव संपल्यानंतर पितृपक्षात हा उत्सव साजरा केला जातो. त्यामुळे हा उत्सव नागपूरच्या अन्य गणेशोत्सवांपेक्षा वैशिष्ट्यपूर्ण ठरतो. 00000000

नागपूर पदवीधर मतदारसंघासाठी २३ ऑक्टोबरला मतदान २९ सप्टेंबरला अधिसूचना ६ ऑक्टोबरपर्यंत उमेदवारी अर्ज दाखल करता येणार २७ ऑक्टोबर रोजी मतमोजणी नागपूर विभागात आदर्श आचारसंहिता लागू

नागपूर पदवीधर मतदारसंघासाठी २३ ऑक्टोबरला मतदान २९ सप्टेंबरला अधिसूचना ६ ऑक्टोबरपर्यंत उमेदवारी अर्ज दाखल करता येणार २७ ऑक्टोबर रोजी मतमोजणी नागपूर विभागात आदर्श आचारसंहिता लागू नागपूर, दि. २२ : महाराष्ट्र विधान परिषदेच्या नागपूर पदवीधर मतदारसंघासह राज्यातील पदवीधर व शिक्षक मतदारसंघांच्या द्वैवार्षिक निवडणुकीचा कार्यक्रम भारत निवडणूक आयोगाने जाहीर केला आहे. त्यानुसार नागपूर पदवीधर मतदारसंघासाठी २३ ऑक्टोबर २०२६ रोजी मतदान होणार असून, मतदानाची वेळ सकाळी ८ ते सायंकाळी ४ अशी राहणार आहे. निवडणूक कार्यक्रमानुसार २९ सप्टेंबर २०२६ रोजी निवडणुकीची अधिसूचना प्रसिद्ध करण्यात येईल. उमेदवारी अर्ज दाखल करण्याची अंतिम तारीख ६ ऑक्टोबर असून, ७ ऑक्टोबर रोजी उमेदवारी अर्जांची छाननी करण्यात येईल. उमेदवारी अर्ज मागे घेण्याची अंतिम तारीख ९ ऑक्टोबर आहे. २३ ऑक्टोबर रोजी मतदान झाल्यानंतर २७ ऑक्टोबर रोजी मतमोजणी करण्यात येणार आहे. संपूर्ण निवडणूक प्रक्रिया ३१ ऑक्टोबर २०२६ पूर्वी पूर्ण करण्यात येणार आहे. नागपूर पदवीधर मतदारसंघांतर्गत संबंधित सहाही जिल्ह्यांमध्ये तत्काळ प्रभावाने आदर्श आचारसंहिता लागू झाली आहे. निवडणूक प्रक्रिया भारत निवडणूक आयोगाच्या निर्देशांनुसार पार पाडण्यात येणार आहे. महाराष्ट्रातील तीन पदवीधर आणि दोन शिक्षक मतदारसंघांसाठी ही निवडणूक होत आहे. निवडणूक कार्यक्रमानुसार २९ सप्टेंबर रोजी अधिसूचना, ६ ऑक्टोबर उमेदवारी अर्ज दाखल करण्याची अंतिम तारीख, ७ ऑक्टोबर अर्जांची छाननी, ९ ऑक्टोबर उमेदवारी अर्ज मागे घेण्याची अंतिम तारीख, २३ ऑक्टोबर मतदान आणि २७ ऑक्टोबर रोजी मतमोजणी होणार आहे. 00000

*भरती परीक्षा सुधारणांसाठी उच्चस्तरीय टास्क फोर्सचा राज्यव्यापी संवाद*

• *सहा विभागांना याच महिन्यात भेटी* • *विद्यार्थी, उमेदवार व संबंधित घटकांशी साधणार थेट संवाद* मुंबई : राज्यातील भरती परीक्षा अधिक सुरक्षित, पारदर्शक, विश्वासार्ह व उमेदवाराभिमुख करण्यासाठी महाराष्ट्र शासनाने ४ सप्टेंबर २०२६ रोजीच्या शासन निर्णयान्वये उच्चस्तरीय टास्क फोर्स गठीत केला आहे. राज्यातील भरती परीक्षा पद्धतीचा सर्वंकष अभ्यास करून आवश्यक सुधारणा सुचविण्यासाठी टास्क फोर्स राज्यातील सर्व सहा विभागांना प्रत्यक्ष भेट देणार आहे. या भेटीदरम्यान विद्यार्थी, स्पर्धा परीक्षा उमेदवार, पालक, शिक्षक, शैक्षणिक संस्था तसेच अन्य संबंधित हितधारकांशी थेट संवाद साधून त्यांच्या सूचना, अडचणी व अभिप्राय जाणून घेतले जाणार आहेत. *टास्क फोर्सच्या विभागनिहाय भेटींचे वेळापत्रक* पुणे विभाग — १२ सप्टेंबर २०२६ स्थळ : सावित्रीबाई फुले पुणे विद्यापीठ, पुणे ई-मेल : pune-examreformstaskforce@maharashtra.gov.in नागपूर विभाग — १६ सप्टेंबर २०२६ स्थळ : डीपीडीसी हॉल, नियोजन भवन, सदर पोलीस स्टेशनच्या मागे, सिव्हिल लाइन्स, नागपूर ई-मेल : nagpur-examreformstaskforce@maharashtra.gov.in अमरावती विभाग — १७ सप्टेंबर २०२६ स्थळ : अमरावती ई-मेल : amravati-examreformstaskforce@maharashtra.gov.in छत्रपती संभाजीनगर विभाग — २१ सप्टेंबर २०२६ स्थळ : स्मार्ट सिटी कार्यालय, आमखास मैदानाजवळ, छत्रपती संभाजीनगर ई-मेल : csn-examreformstaskforce@maharashtra.gov.in कोकण विभाग — २९ सप्टेंबर २०२६ स्थळ : चेतना महाविद्यालय व मुंबई उपनगर जिल्हाधिकारी कार्यालय, मुंबई ई-मेल : konkan-examreformstaskforce@maharashtra.gov.in नाशिक विभाग — ३० सप्टेंबर २०२६ स्थळ : जिल्हाधिकारी कार्यालय, नाशिक ई-मेल : nashik-examreformstaskforce@maharashtra.gov.in नागरिक व संबंधित हितधारक आपल्या सूचना व अभिप्राय संबंधित विभागाच्या वरील ई-मेल पत्त्यावर पाठवू शकतात. या विभागनिहाय संवादातून प्राप्त होणाऱ्या सूचना व अभिप्रायांचा टास्क फोर्सकडून अभ्यास करण्यात येणार आहे. त्याआधारे भरती परीक्षांमधील गैरप्रकारांना प्रतिबंध, परीक्षा सुरक्षेचे बळकटीकरण, प्रक्रियेतील पारदर्शकता व विश्वासार्हता वाढविणे तसेच परीक्षा व्यवस्था अधिक उमेदवाराभिमुख करण्यासाठी आवश्यक सुधारणांबाबत शासनास शिफारशी सादर करण्यात येतील. भेटीची वेळ, सहभागाची प्रक्रिया तसेच इतर सविस्तर माहिती संबंधित विभागीय आयुक्त कार्यालयाकडून स्वतंत्रपणे प्रसिद्ध करण्यात येईल.

भरती परीक्षा अधिक पारदर्शक, सुरक्षित करण्यासाठी नागपूर विभागातून सूचना आणि अभिप्राय मागविले

उच्चस्तरीय समिती १६ सप्टेंबरला नागपुरात नागपूर जिल्हाधिकारी कार्यालयात असणार विशेष कक्ष विद्यार्थी, परीक्षार्थी, पालकांसह सर्व संबंधित घटकांना अभिप्राय पाठविण्याचे आवाहन नागपूर, दि. ८ : राज्यातील शासकीय भरती परीक्षा अधिक सुरक्षित, पारदर्शक, विश्वासार्ह व उमेदवाराभिमुख करण्यासाठी तसेच परीक्षांमधील गैरप्रकारांना प्रतिबंध घालण्यासाठी महाराष्ट्र शासनाच्या सामान्य प्रशासन विभागाने अपर मुख्य सचिव यांच्या अध्यक्षतेखाली उच्चस्तरीय समिती गठित केली आहे. या समितीच्या कार्यकक्षेनुसार राज्यातील प्रत्येक महसुली विभागातील विद्यार्थी, स्पर्धा परीक्षा परीक्षार्थी, पालक, शिक्षक, शैक्षणिक संस्थांचे प्रतिनिधी, कोचिंग क्लासेस, अभ्यासिका चालक, लोकप्रतिनिधी, नागरिक आणि अन्य संबंधित घटकांकडून परीक्षा पद्धतीतील सुधारणांसाठी सूचना व अभिप्राय मागविण्यात आले आहेत. या अनुषंगाने समितीचे अध्यक्ष व सदस्य बुधवार, दि. १६ सप्टेंबर २०२६ रोजी सकाळी ११ वाजता नियोजन भवन, सदर पोलीस स्टेशनच्या मागे, सिव्हिल लाइन्स, नागपूर येथे कामकाजाच्या अनुषंगाने भेट देणार आहेत. त्यापूर्वी नागपूर विभागातील संबंधित घटकांकडून सूचना व अभिप्राय संकलित करण्यासाठी जिल्हाधिकारी कार्यालय, नागपूर येथे विशेष कक्ष स्थापन करण्यात आला आहे. हा कक्ष बुधवार, दि. ९ सप्टेंबर २०२६ रोजी सकाळी १० वाजेपासून मंगळवार, दि. १५ सप्टेंबर २०२६ रोजी सायंकाळी ६ वाजेपर्यंत कार्यरत राहणार आहे. सूचना व अभिप्राय निवासी उपजिल्हाधिकारी, जिल्हाधिकारी कार्यालय, नागपूर यांच्याकडे सादर करता येतील. प्रत्यक्ष सूचना निवासी उपजिल्हाधिकारी यांची स्वीय शाखा, जिल्हाधिकारी कार्यालय, नागपूर येथे स्वीकारण्यात येतील. तसेच nagpur-examreformstaskforce@maharashtra.gov.in या ई-मेलवरही लेखी अभिप्राय पाठविता येणार आहे. जिल्हाधिकारी कार्यालयातील विशेष कक्षात प्रत्यक्ष उपस्थित राहणे शक्य नसलेल्या नागरिकांनी विहित मुदतीत ई-मेलद्वारे आपले अभिप्राय सादर करावेत, असे आवाहन करण्यात आले आहे. विद्यमान परीक्षा प्रणाली व विविध विभाग, प्राधिकरणे तसेच परीक्षा घेणाऱ्या संस्थांच्या कार्यपद्धतीचा आढावा, परीक्षा अधिक सुरक्षित, निष्पक्ष, पारदर्शक व उमेदवाराभिमुख करण्यासाठी आवश्यक उपाययोजना, प्रश्नपत्रिका तयार करण्यापासून निकाल प्रक्रियेपर्यंतची सुरक्षा, प्रश्नपत्रिकेचे मॉडरेशन, डिजिटल अथवा मुद्रित वितरण, गोपनीय वाहतूक, परीक्षा केंद्रांचे व्यवस्थापन, प्रतिसाद नोंदणी आणि मूल्यांकन याबाबत सूचना अपेक्षित आहेत. तसेच बायोमेट्रिक प्रमाणीकरण, प्रवेश नियंत्रण, ऑडिट ट्रेल्स आणि सीसीटीव्ही देखरेख यांसारख्या माहिती तंत्रज्ञानाचा प्रभावी वापर, पेपरफुटी, गोपनीयतेचा भंग, तोतया उमेदवार, संगनमत आणि इलेक्ट्रॉनिक उपकरणांचा गैरवापर रोखण्यासाठी प्रतिबंधात्मक उपाय व उत्तरदायित्व निश्चित करणे याबाबतही अभिप्राय मागविण्यात आले आहेत. इतर राज्ये अथवा देशांतील यशस्वी व आधुनिक परीक्षा पद्धतींचा अभ्यास, परीक्षा केंद्रांसाठी किमान पायाभूत व सुरक्षा मानके, जिल्हाधिकारी कार्यालय, पोलीस यंत्रणा, शिक्षण विभाग आणि परीक्षा संस्थांमधील समन्वय तसेच उमेदवारांसाठी जलद व पारदर्शक तक्रार निवारण प्रणाली याबाबतही सूचना देता येणार आहेत. जिल्हाधिकारी कार्यालयामार्फत प्राप्त होणाऱ्या सर्व सूचना व अभिप्रायांचे संकलन करून ते शासनाच्या उच्चस्तरीय समितीकडे सादर करण्यात येणार आहेत. समिती या सूचना व शिफारशींचा सखोल अभ्यास करून राज्य शासनाला सर्वसमावेशक अंतिम अहवाल सादर करणार आहे. राज्यातील लाखो स्पर्धा परीक्षा परीक्षार्थींच्या भवितव्याशी संबंधित असलेल्या या प्रक्रियेत नागपूर महसूल विभागातील सर्व संबंधित घटकांनी उत्स्फूर्त सहभाग नोंदवून आपल्या सूचना व अभिप्राय सादर करावेत, असे आवाहन विभागीय आयुक्त विजयलक्ष्मी बिदरी यांनी केले आहे.