इयत्ता 10 वी प्रात्यक्षिक परीक्षेच्या तारखा जाहीर

नागपूर, दि. 16 : माध्यमिक शालांत प्रमाणपत्र परीक्षा इयत्ता 10 वी फेब्रुवारी/मार्च 2020 च्या परीक्षेला बसणाऱ्या विज्ञान व तंत्रज्ञान विषयाची तसेच तंत्र व एनएसक्युएफ अंतर्गत पूर्व व्यावसायिक विषयांची प्रात्यक्षिक परीक्षा  तसेच दिव्यांग (अंध, अपंग, मूक-बधीर, बहुविकलांग व अध्ययन अक्षमता)  असलेल्या विद्यार्थ्यांसाठी असलेल्या विषय, योजनेतील कार्यानुभव विषयाची प्रात्यक्षिक परीक्षा फेब्रुवारी/ मार्च 2020 मध्ये घेण्यात येणार असल्याचे मंडळाचे विभागीय सचिव रविकांत देशपांडे यांनी सर्व मान्यताप्राप्त माध्यमिक शाळेच्या मुख्याध्यापकांना सूचित केले आहे.

इयत्ता 10 वी ची प्रात्यक्षिक श्रेणी व तोंडी परीक्षा गुरुवार, दिनांक 13 फेब्रुवारी ते सोमवार, दिनांक 2 मार्च 2020 या दरम्यान, तंत्र व एनएसक्युएफ अंतर्गत पूर्व व्यावसायिक अभ्यासक्रम विषयाची प्रात्यक्षिक परीक्षा गुरुवार, दिनांक 13 फेब्रुवारी ते सोमवार, दिनांक 2 मार्च 2020 दरम्यान शरीरशास्त्र, आरोग्यशास्त्र व गृहशास्त्र विषयाची प्रात्यक्षिक परीक्षा गुरुवार, दिनांक 13 फेब्रुवारी ते सोमवार, 2 मार्च 2020 या दरम्यान आऊट ऑफ टर्न परीक्षा मंगळवार, दिनांक 24 मार्च 2020 व गुरुवार, 26 मार्च 2020 या दरम्यान दिव्यांग विद्यार्थ्यांची कार्यानुभव विषयाची लेखी व प्रात्यक्षिक परीक्षा मंगळवार, दिनांक 24 मार्च ते शुक्रवार, दिनांक 3 एप्रिल 2020 पर्यंत घेण्यात येणार आहे.  मुख्याध्यापकांनी प्रात्यक्षिक परीक्षेचे नमूद दिनांकास आयोजन करावे व सदर परीक्षेचे वेळापत्रक विभागीय मंडळास त्वरित कळवावे.

इयत्ता 10 वी च्या परीक्षेस प्रविष्ठ होणाऱ्या पुनर्परीक्षार्थी विद्यार्थ्यांना प्रात्यक्षिक परीक्षेस प्रविष्ट होणे अनिवार्य राहील. कोणत्याही पुनर्परीक्षार्थी विद्यार्थ्यांचे प्रात्यक्षिक परीक्षेचे मागील परीक्षेचे गुण ग्राह्य धरण्यात येणार नाही. इयत्ता 10 वी मार्च 2020 च्या परिक्षेस नियमित परीक्षार्थी म्हणून प्रविष्ट दिव्यांग विद्यार्थीसाठी असलेल्या घरगुती विद्युत उपकरणे या विषयाची परीक्षा मंगळवार, दिनांक 24 मार्च 2020 दूध व दुधाचे पदार्थ या विषयाची परीक्षा गुरुवार, दिनांक 26 मार्च 2020 रोजी, हस्तभरतकाम या परीक्षा शुक्रवार, 27 मार्च 2020 रोजी, शिवणयंत्रणाद्वारे शिलाई व शिवणयंत्राची निगा व दुरुस्ती या विषयांची परीक्षा शनिवार, दिनांक 28 मार्च 2020 टाकाऊ वस्तूपासून सौंदर्याकृती या परीक्षा सोमवार, दिनांक 30 मार्च 2020 पाककला विषयाची परीक्षा मंगळवार, दिनांक 31 एप्रिल 2020 या भारतीय संगीत (गायन- वादन) परीक्षा बुधवार, दिनांक 1 एप्रिल 2020 रोजी, चित्रकला व रंगकाम परीक्षा गुरुवार, दिनांक 2 एप्रिल 2020 तर कागदकाम, पुठ्ठाकाम व पुस्तकबांधणी या विषयाची परीक्षा शुक्रवार, दिनांक 3 एप्रिल 2020  रोजी घेण्यात येणार आहे.

प्रात्यक्षिक परीक्षेचे साहित्य निर्धारित दिनांकास मंडळ कार्यालयात जमा झाले नाही किंवा उशिरा प्राप्त झाले व त्यामुळे प्रात्यक्षिक परीक्षेच्या गुणाअभावी निकाल राखीव राहिल्यास याबाबत सर्वस्वी जबाबदारी संबंधित मुख्याध्यापकांची राहील याची नोंद घ्यावी, असे आवाहन मंडळाचे विभागीय सचिव रविकांत देशपांडे यांनी केले.

000000