संविधान सप्ताहानिमित्त विविध कार्यक्रमांचे आयोजन

मुंबई, दि. 25 : सामाजिक न्याय व विशेष सहाय्य विभाग, डॉ.बाबासाहेब आंबेडकर संशोधन व प्रशिक्षण संस्था (बार्टी), पुणे, व डॉ.बाबासाहेब आंबेडकर समता प्रतिष्ठान, नागपूर यांच्या संयुक्त विद्यमाने दि. 26 नोव्हेंबर, 2018 ते दि. 2 डिसेंबर, 2018 या कालावधीत ‘संविधान सप्ताह’निमित्ताने राज्यभर विविध कार्यक्रमांचे आयोजन करण्यात आले आहे. 

 संविधान सप्ताहामध्ये राज्यातील सर्व प्राथमिक, माध्यमिक शाळेतील व महाविद्यालयातील विद्यार्थी सहभागी होऊन संविधानाच्या उद्देशिकेचे समूह वाचन करतील. या सप्ताहामध्ये संविधानावर आधारित निबंध स्पर्धा, वक्तृत्व स्पर्धा, पथनाट्य, प्रश्नमंजुषा, चित्ररथ, संविधान प्रतींचे वाटप, संविधान जलसा, दिव्यांग कला सादरीकरण, ‘भारतीय संविधान’ आधारित प्रबोधन कार्यक्रम, ‘संविधानातील मूलभूत हक्क’ यांचे वाचन,चर्चासत्र आदी कार्यक्रम राबविले जातील. या संविधान सप्ताहानिमित्त प्रत्येक जिल्ह्यात समाजकल्याण कार्यालय व जिल्हा माहिती कार्यालय यांच्या संयुक्त विद्यमाने चर्चासत्राचे  आयोजन करण्यात येणार आहे.

0000