नागपूर दि.25 : विविध इलेक्ट्रॉनिक्स उपकरणांसह शेतकऱ्यांना ग्रामपंचायत कार्यालयातच त्यांच्या सातबारा आणि शेतीशी निगडीत कागदपत्रे तात्काळ ऑनलाईन मिळावेत, या उद्देशाने ‘फ्रिक्वेन्सी कंट्रोल डिव्हाइस’ची स्थापना करण्यात आली आहे. या डिव्हाइसचे पालकमंत्री चंद्रशेखर बावनकुळे यांनी चिकना गावी उद्घाटन केले.
चिकना गट ग्रामपंचायत येथे प्रायोगिक तत्त्वावर सुरु करण्यात आलेल्या ‘फ्रिक्वेन्सी कंट्रोल डिव्हाइस’च्या उद्घाटनप्रसंगी ग्रीन लाईन सोल्युशन्स कंपनीच्या संचालिका नेहा देशमुख व विपुल गुप्ते आदी उपस्थित होते.
जिल्ह्यातील ग्रामीण भागात शहराप्रमाणे आधुनिक संसाधनांची उपलब्धता आवश्यक आहे. त्याचप्रमाणे ग्रामीण क्षेत्रातील प्रशासकीय कामकाजास गती देणे, काळानुसार गरजेचे झाले आहे. ही बाब लक्षात घेत पालकमंत्री चंद्रशेखर बावनकुळे यांनी ग्रामपंचायत कार्यालय हायटेक करण्याचा निर्णय घेतला. त्यानुसार नागपूर ग्रामीण तालुक्यातील चिकना गावी ‘फ्रिक्वेन्सी कंट्रोल डिव्हाइस’ची स्थापना करण्यात आली आहे. या डिवाइसच्या माध्यमातून ग्रामपंचायत व गावकऱ्यांच्या विकासासाठी सरकारने दिलेल्या सर्व ऑनलाईन सुविधा वापरता येणार आहेत,अशी माहिती पालकमंत्री चंद्रशेखर बावनकुळे यांनी उद्घाटन प्रसंगी दिली.
नागपूर येथील ‘ग्रीन लाईन सोल्युशन्स’ कंपनीच्या सहकार्याने हा उपक्रम जिल्ह्यातील विविध ग्रामपंचायतीमध्ये राबविण्यात येणार आहे. या डिव्हाइसद्वारे ग्रामीण भागात ऑनलाईन पद्धतीने चालणाऱ्या विविध कामांना गती मिळणार आहे. या उपक्रमाद्वारे ग्रामपंचायतीच्या
कर्मचाऱ्यांची व गावकऱ्यांच्या समस्येची तात्काळ सोडवणूक होण्यास मदत होईल. यावेळी मोठ्या संख्येने गावकरी उपस्थित होते.
*****
No comments:
Post a Comment