जिल्हा लोकशाही दिनात जनतेच्या तक्रारी स्वीकारणार

* सोमवारी जिल्हा लोकशाही दिन

नागपूर, दि. 28 : जनतेची गाऱ्हाणी व तक्रारी सोडविण्यासाठी जिल्हा लोकशाही दिनाचे आयोजन करण्यात येत असून शासनस्तरावर प्रलंबित असलेल्या तक्रारी येत्या सोमवार,दिनांक 2 एप्रिल रोजीच्या जिल्हा लोकशाही दिनात सादर कराव्यात, असे आवाहन जिल्हाधिकारी सचिन कुर्वे यांनी केले आहे.

जिल्हास्तरीय लोकशाही दिन सोमवार, दिनांक 2 एप्रिल 2018 रोजी जिल्हाधिकारी कार्यालयातील छत्रपती सभागृह येथे दुपारी 1 ते 2 या कालावधीत आयोजित करण्यात आला आहे. यावेळी  जिल्हाधिकारी सचिन कुर्वे हे जनतेच्या तक्रारी व गाऱ्हाणी  ऐकतील.

तक्रारकर्त्यांनी तालुकास्तरावरील लोकशाही दिनात दिलेल्या निवेदनाची प्रत, लोकशाही दिनाच्या टोकनाची प्रत तसेच विहीत नमुन्यातील अर्ज या सर्व प्रतींचे स्वतंत्र दोन संच  घेऊन दुपारी 1 ते 2 वाजेपर्यंत स्वत: उपस्थित रहावे.

न्याय प्रविष्ट प्रकरणे, राजस्व/अपील्स प्रकरणे, न्यायालयीन प्रक्रियेचा अंतर्भाव असलेली प्रकरणे, सेवाविषयक व नोकरीविषयक व आस्थापना विषयक प्रकरणे, कार्यालय प्रमुखांनी अंतीम उत्तरे दिलेले प्रकरणे, विहित नमुन्यात नसणारे व त्यासोबत आवश्यक कागदपत्राच्या प्रती न जोडलेले अर्ज स्वीकारण्यात येणार नाही, अशी माहिती निवासी उपजिल्हाधिकारी यांनी प्रसिद्धी पत्रकाद्वारे दिली आहे.

*****