गणेशोत्सवापूर्वी महाराष्ट्र करणार चुलमुक्त - सुधीर मुनगंटीवार

मुंबई, दि. 4 : राज्यात 45 लाख कुटुंबांकडे गॅस जोडणी नाही त्यांना गणेशोत्सवापूर्वी  गॅस जोडणी   देऊन अवघा महाराष्ट्र चुलमुक्त करणार असल्याची माहिती, अर्थ मंत्री सुधीर मुनगंटीवार यांनी दिली.

आज सह्याद्री अतिथीगृहात झालेल्या बैठकीत ते बोलत होते. यावेळी अन्न व नागरी पुरवठा मंत्री गिरीश बापट, विभागाचे  प्रधान सचिव  महेश पाठक, चंद्रपूर चे जिल्हाधिकारी कुणाल खेमणार यांच्यासह सर्व संबंधित अधिकारी उपस्थित होते.

मुख्य सचिवांनी या संदर्भात सर्व संबंधितांची बैठक घ्यावी अशा सूचना देऊन श्री. मुनगंटीवार म्हणाले, चुलीच्या धुरापासून महिलांच्या डोळ्यांना होणारा त्रास थांबविण्यासाठी प्रधानमंत्री उज्वला योजना देशभर राबविली जात आहे. या योजनेंतर्गत महाराष्ट्रात ज्या लाभार्थ्यांना गॅस जोडणी देणे शक्य आहे त्यांची यादी तयार करण्यात यावी. उर्वरित जे लाभार्थी उज्वला योजनेत लाभ घेऊ शकत नाहीत त्यांना  गॅस जोडणी देण्यासाठी राज्य शासन निधी उपलब्ध करून देईन. अन्न व नागरी पुरवठा विभागाने याचा सविस्तर अभ्यास करून लागणाऱ्या निधीचा प्रस्ताव वित्त विभागाकडे सादर करावा, त्यास मंजुरी दिली जाईल.

बल्लारपूर  विधानसभा क्षेत्राचा आढावा

अर्थमंत्र्यांनी याच बैठकीत बल्लारपूर विधानसभा क्षेत्रातील गॅस जोडणीचा ही आढावा घेतला.  या क्षेत्रात गॅस नसलेल्या शिधापत्रिकांची संख्या 11 हजार 83 इतकी आहे. जिल्हाधिकारी चंद्रपूर यांनी या शिधापत्रिका धारकांना गॅस जोडणी देऊन पूर्ण विधानसभा क्षेत्र गॅसयुक्त करण्यासाठी त्यांचे रेशनकार्ड, बँक खाते आणि बँक खात्याची आधार कार्डशी जोडणी अशी तीन कामे प्राधान्याने हाती घ्यावीत, गॅस जोडणीयुक्त तालुक्याचे काम वेगाने पूर्ण करण्यासाठी फिरते वाहन तयार करावे जे दिलेल्या तारखेस निश्चित वेळी निश्चित ठिकाणी जाऊन फॉर्म संकलित करील. या वाहनात प्रशिक्षित कर्मचारी नियुक्त करण्यात यावेत जेणेकरून गॅस जोडणीसाठी सादर केलेला अर्ज अचूकपणे भरला की नाही हे पाहिले जाईल,  विधानसभा क्षेत्रात अर्ज स्वीकारण्यासाठी समन्वयक नेमण्यात यावेत अशा सूचना ही त्यांनी यावेळी केल्या. 

या विधानसभा क्षेत्रात बल्लारपूर येथे 2 हजार 807, मूल मध्ये 6 हजार 346, पोंभूर्णा, 1 हजार 196, चंद्रपूर ग्रामीण 734 अशी  एकूण 11 हजार 83 गॅस नसलेल्या शिधापत्रिकांधारकांची संख्या आहे. त्यांना येत्या काही दिवसात गॅस जोडण्या देण्याबाबतच्या कार्यवाहीला वेग देण्याच्या सूचना ही श्री. मुनगंटीवार यांनी दिल्या.

0000