राज्यपाल चे. विद्यासागर राव यांची कॉसमॉस बँकेला भेट

'आय एम बँकिग ॲप' चा शुभारंभ

पुणे, दि.५ : महाराष्ट्राचे राज्यपाल चे. विद्यासागर राव यांनी आज कॉसमॉस बँकेच्या कॉसमॉस पॉवर या प्रशासकीय कार्यालयास भेट दिली. यावेळी राज्यपाल श्री. राव यांच्या हस्ते कॉसमॉस बँकेच्या 'आय एम बँकिंग ॲप'चा शुभारंभ करण्यात आला. यावेळी बँकेचे अध्यक्ष मिलींद काळे, उपाध्यक्ष गोविंद क्षीरसागर, बँकेच्या संचालक मंडळाचे सदस्य, व्यवस्थापकीय संचालक आदी उपस्थित होते.

राज्यपाल श्री. राव यांनी कॉसमॉस बँकेच्या प्रशासकीय इमारतीमध्ये माहिती  तंत्रज्ञान विभागास भेट दिली. तसेच बँकेच्या आधुनिक तंत्रज्ञानाच्या वापराबाबत  कौतुक केले. श्री. राव म्हणाले, कॉसमॉस बँक कामकाजात सातत्याने  सुधारणा करत आहे. माहिती तंत्रज्ञानावर भर देवून तयार केलेले हे मोबाईल ॲप वापरण्यास सुलभ व सुरक्षित आहे. यामुळे डिजीटल इंडियाकडे वाटचाल करणे सोपे होईल.

बँकेचे अध्यक्ष श्री. काळे म्हणाले,  बँकेच्या ‘आय एम बँकिंग’ या मोबाईल ॲपव्दारे खातेदारांना बँकिंग सेवा- सुविधा अत्यंत सोप्या, सुरक्षित तसेच कुठेही व कधीही उपलब्ध होणार आहेत. या ॲपव्दारे ठेव खाते उघडणे, धनादेश पुस्तक मागणी, रक्कम वर्ग करणे, इतर बिलामध्ये रक्कम अदा करणे इ. सर्व सेवा सुविधाही उपलब्ध होणार आहेत. बँकेचे उपाध्यक्ष गोविंद क्षीरसागर यांनी आभार मानले.

                                                           

 ०००