रखडलेल्या पाणीपुरवठा योजना त्वरीत पुर्ण करा - बबनराव लोणीकर

राष्ट्रीय ग्रामीण पेयजल व मुख्यमंत्री पेयजल योजनेतील कामाच्या आढावा बैठकीत निर्देश

नागपूर, दि. 4 - राष्ट्रीय ग्रामीण पेयजल कार्यक्रम व मुख्यमंत्री पेयजल योजनेतील रखडलेल्या योजना त्वरीत पुर्ण करा, तसेच योजनेचे काम पुर्ण करण्यास विलंब लावणा-या संबंधीत अधिकारी व कंत्राटदारांची चौकशी करून कारवाई करण्यात यावी, असे निर्देश पाणी पुरवठा व स्वच्छता मंत्री बबनराव लोणीकर यांनी आज दिले.

            पाणी पुरवठा व स्वच्छता विभागातर्फे तेलंगखेडी परिसरातील महाराष्ट्र जीवन प्राधिकरणाच्या सभागृहात आयोजित केलेल्या राष्ट्रीय ग्रामीण पेयजल व मुख्यमंत्री पेयजल योजनेतील कामाच्या आढावा बैठकीत ते बोलत होते.

            यावेळी पाणी पुरवठा व स्वच्छता विभागाचे अपर मुख्य सचिव शाम लाल गोयल, महाराष्ट्र जीवन प्राधिकरणाचे सदस्य सचिव पी. वेला रासू, पाणी पुरवठा व स्वच्छता विभागाचे मुख्य कार्यकारी अधिकारी चंद्रकांत गजभिये, प्रकल्प संचालक डॉ. अभय महाजन, 

 महाराष्ट्र जीवन प्राधिकरणाच्या नागपूर प्रादेशिक विभागाचे मुख्य अभियंता विजय जगतारे प्रामुख्याने उपस्थित होते.

            यावेळी श्री. लोणीकर यांनी नागपूर विभागातील नागपूर, वर्धा, चंद्रपूर, गोंदिया, भंडारा, गडचिरोली व चंद्रपूर या जिल्ह्यातील जिल्हा परिषद व महाराष्ट्र जीवन प्राधिकरणामार्फत राबविण्यात येणा-या राष्ट्रीय ग्रामीण पेयजल व मुख्यमंत्री पेयजल योजनेंच्या कामांचा आढावा घेतला. या योजनांसाठी शासनाने मोठ्या प्रमाणावर निधी उपलब्ध करून दिला असून या योजना त्वरीत पुर्ण करणा-याकडे अधिका-यांनी विशेष लक्ष द्यावे, असे निर्देश त्यांनी यावेळी दिले. यावेळी श्री. लोणीकर यांनी या जिल्ह्यांमधील काही रखडलेल्या योजनांबाबत नाराजी व्यक्त करून वरिष्ठ अधिका-यांनी विशेष लक्ष देऊन या योजना लवकरात लवकर पुर्ण करून शासनाला तात्काळ अहवाल पाठविण्याच्या सुचनाही केल्या. योजना पुर्ण करण्यास विलंबाला जबाबदार असलेल्या संबंधीत अधिकारी व कंत्राटदारांची चौकशी करून त्यांच्यावर कारवाई करण्याबाबातच्या सुचना संबंधीत जिल्हा परिषदचे मुख्य कार्यकारी अधिकारी यांना देऊन शासनाला त्वरीत अहवाल पाठवावा, असे निर्देशही त्यांनी यावेळी उपस्थित वरिष्ठ अधिका-यांना दिले.

            या बैठकीत पुर्नजीवन पाणी पुरवठा योजना व अमृत कार्यक्रम पाणी पुरवठा व मलनिस्सारण योजनेच्या कामांचाही आढावा घेण्यात आला. ही कामे पुर्ण करण्याकरीता तात्काळ योग्य कार्यवाही करण्याच्या सुचनाही त्यांनी यावेळी अधिका-यांना दिल्या. बैठकीत नागपूर, वर्धा, चंद्रपूर, भंडारा, गोंदिया व गडचिरोली येथील अधिकारी उपस्थित होते.

*****