शेतकऱ्यांकडील कापूस येत्या वीस दिवसांत खरेदी करणार - रविंद्र ठाकरे

* पंधरा केंद्रांवर कापूस खरेदी सुरु

                                                 * नोंदणीकृत शेतकऱ्यांकडूनच कापूस खरेदी

        नागपूर, दि. 22 :  कापूस उत्पादक शेतकऱ्यांकडे असलेला कापूस राज्य शासनाच्या निर्देशानुसार जिल्ह्यातील पंधरा केंद्रांवर खरेदी करण्यात येत असून येत्या 15 ते 20 दिवसांत शेतकऱ्यांकडील संपूर्ण कापूस खरेदी करण्यात येणार असल्याची माहिती जिल्हाधिकारी रविंद्र ठाकरे यांनी आज दिली.

            कापूस उत्पादक शेतकऱ्यांकडून कापूस पणन महासंघ व पीसीआयमार्फत कापसाची खरेदी जिल्ह्यात सुरु करण्यात आली आहे. जिल्ह्यात कोविड-19 नंतर 39 हजार 352 शेतकऱ्यांची नोंदणी करण्यात आली असून त्यापैकी 3 हजार 504 शेतकऱ्यांकडून कापसाची खरेदी करण्यात आली आहे. अद्याप 25 हजार 648 शेतकऱ्यांकडून कापूस खरेदीची प्रक्रिया सुरु आहे. कापूस खरेदी करताना नोंदणीकृत शेतकऱ्यांकडूनच कापसाची खरेदी करण्याचे निर्देश दिले असून व्यापारी अथवा बाहेरुन येणाऱ्या राज्यातील कापूस खरेदी करण्यात येवू नये यादृष्टीने आवश्यक खबरदारी घेण्यात आली आहे. रविवार वगळता इतर सुटीच्या दिवशी कापूस खरेदी सुरु राहणार असल्याची माहिती जिल्हाधिकारी रविंद्र ठाकरे यांनी दिली.

            कापूस खरेदीसाठी 15 जिनिंग व प्रेसिंग येथे व्यवस्था करण्यात आली आहे. यासाठी आवश्यक ग्रेडर कृषी विभागामार्फत नियुक्त करण्यात आले आहे. शेतकऱ्यांनी उत्पादित कापूस खरेदी केल्यावर आणतांना सोशल डिस्टन्सिंगचे नियम पाळणे बंधनकारक  असल्याचेही जिल्हाधिकाऱ्यांनी सांगितले.

***