नागपूर व नाशिक विभागात 2 ऑक्टोबरपासून मौखिक आरोग्य सर्वेक्षण मोहीम – डॉ.दीपक सावंत

मुंबई, दि. 1 : राज्यात 2 ऑक्टोबरपासून नागपूर आणि नाशिक विभागात मौखिक आरोग्य सर्वेक्षण मोहीम पुन्हा हाती घेण्यात येणार असून, यासंदर्भात टाटा कर्करोग रुग्णालयाचे सहकार्य मिळणार असल्याचे आरोग्यमंत्री डॉ.दीपक सावंत यांनी आज येथे सांगितले.

मंत्रालयात कर्करोग निदान व तपासणी मोहीमेसंदर्भात आढावा बैठक झाली. यावेळी आरोग्य विभागाचे प्रधान सचिव डॉ.प्रदीप व्यास, टाटा कर्करोग रुग्णालयाचे संचालक डॉ.राजेंद्र बडवे उपस्थित होते.

 गेल्या वर्षी डिसेंबरमध्ये संपूर्ण महिनाभर 34 जिल्ह्यांमध्ये मौखिक आरोग्य सर्वेक्षण मोहीम राबविण्यात आली होती. त्यामध्ये 2 कोटी 15 लाख लोकांचे सर्वेक्षण करण्यात आले. त्यामध्ये 2 लाख 62 हजार संशयित रुग्ण आढळून आले होते. त्यापैकी सुमारे 2013 रुग्ण बायप्सीसाठी संदर्भित करण्यात आले. त्यापैकी 1800 रुग्णांची बायप्सी झाली. त्यातील मौखिक कर्करोगाचे 540 रुग्ण आढळून आले. त्यापैकी 490 रुग्णांवर उपचार सुरु करण्यात आले.

या मोहिमेत मौखिक आरोग्यासंदर्भात सर्वेक्षणानंतर नागपूर व नाशिक विभागांमध्ये मोठ्या प्रमाणावर संशयित रुग्णांची संख्या आढळून आली होती. ते लक्षात घेतल्यानंतर आरोग्यमंत्र्यांनी येत्या 2 ऑक्टोबरपासून या दोन विभागांमध्ये पुन्हा मौखिक आरोग्य सर्वेक्षण राबविण्याचे निर्देश दिले. यासाठी टाटा रुग्णालयाची मदत घेतली जाणार आहे.  

००००