स्मार्ट सिटीसाठी जिओग्राफीकल इनफॉरमेशन सिस्टीम सुधार प्रन्यास व सुदूर संवेदन केंद्र सामंजस्य करार

• मुख्यमंत्र्यांच्या उपस्थितीत सामंजस्य करार
• डिजिटल गर्व्हनर्स महत्वाकांक्षी संकल्पनेला चालना

 

नागपूर दि. 11 :-  नागपूर सुधार प्रन्यास व महाराष्ट्र सुदूर संवेदन केंद्र यांच्यामध्ये मुख्यमंत्री देवेंद्र फडणवीस यांच्या उपस्थितीत सामंजस्य करार करण्यात आला. नागरी ग्रामीण भागामध्ये स्मार्ट सिटी आणि स्मार्ट गावे निर्माण करण्यासाठी आवश्यक जिओग्राफीकल इनफॉरमेशन सिस्टीम या प्रणालीचा वापर करण्यासाठी महाराष्ट्र सुदूर संवेदन उपयोजन केंद्राची या करारामुळे आवश्यक मदत मिळणार आहे.

दीक्षाभूमी येथील सभागृहात नागपूर सुधार प्रन्यासचे सभापती दीपक म्हैसेकर आणि महाराष्ट्र सुदूर संवेदन केंद्राचे संचालक सुब्रोतो दास यांनी सामंजस्य करारावर आज स्वाक्षरी केली. यावेळी पालकमंत्री चंद्रशेखर बावनकुळे, सामाजिक न्यायमंत्री राजकुमार बडोले, मुख्य सचिव स्वाधीन क्षत्रिय, मुख्यमंत्र्यांचे प्रधान सचिव प्रवीण परदेशी, विभागीय आयुक्त अनूप कुमार तसेच वरिष्ठ अधिकारी उपस्थित होते.

नागपूर सुधार प्रन्यासचे मुळ शहरातील कार्यक्षेत्र वाढवून नागपूर महानगर क्षेत्राच्या नियोजनाची जबाबदारी सोपविण्यात आलेली आहे. मुख्यमंत्री देवेंद्र फडणवीस यांनी डिजिटल गर्व्हनर्स या संकल्पनेची प्रभावी अंमलबजावणी करण्याला प्राधान्य दिल्यामुळे रिमोर्ट सेन्सींग आणि जीओग्राफीकल इन्फॉरमेशन सिस्टीम या प्रणालीचा वापर प्रशासनामध्ये निर्णय प्रक्रियेत गतिमानता वाढविण्यासाठी महत्वाचे ठरणार आहे. तसेच नियोजनामध्ये आवश्यक ती संगणक प्रणाली व निर्णय प्रक्रियेमध्ये मदत करण्यासाठी आवश्यक माहिती तयार करण्यासाठी महाराष्ट्र सुदूर संवेदन उपयोजन केंद्राची मदत होणार आहे.

महानगर क्षेत्राच्या विकास योजनांचा नकाशे बेस मॅपसोबत इंटीग्रेशन करणे, सुधार प्रन्यासच्या विकास कामांच्या देखरेख करण्यासाठी मोबाईल अप्लीकेशन तयार करणे, तसेच सर्व माहिती संकेत स्थळावर देण्याकरिता वेब ब्रावझर अप्लीकेशन, पोर्टल तयार करणे ही या प्रकल्पाची मुख्य उद्दिष्ट आहे. या प्रकल्पाअंतर्गत नागपूर महानगरक्षेत्राचा तीन हजार पाचशे छहात्तर चौरस किलोमीटर क्षेत्राचे आणि नागपूर शहराचे 217 चौरस किलोमीटर क्षेत्राचे जीओ मॅपींग करणे सुलभ होणार आहे. या सामंजस्य करारामुळे नागपूर सुधार प्रन्यासतर्फे  विकास कामांचे नकाशे, जलवाहिका, अतिउच्चदाबाचा व इतर विद्युत लाईनचा जिओ स्पॅचीअल डेटा बेस तयार होणार आहे.

00000