कौशल्ययुक्त महाराष्ट्र माहितीपटाचे मुख्यमंत्र्यांच्या हस्ते विमोचन

नागपूर दि. 11 : उद्योगशील महाराष्ट्र व समृध्द महाराष्ट्र हे स्वप्न उराशी बाळगून मुख्यमंत्री देवेन्द्र फडणवीस यांनी मेक इन इंडियाच्या धर्तीवर मेक इन महाराष्ट्र ही संकल्पना राबविण्याचा महत्वपूर्ण निर्णय घेतला आहे. राज्यातील मनुष्यबळाचं कौशल्य विकसीत करण्यासोबत रोजगार व स्वयंरोजगाराच्या संधी उपलब्ध करून देण्यासाठी विविध कौशल्य विषयक योजनांची अंमलबजावणी सुरू केली आहे.

विदर्भातील अकराही जिल्हयात कौशल्य विकासातून झालेल्या प्रगतीचा आढावा घेणाऱ्या कौशल्ययुक्त महाराष्ट्र या माहितीपटाचे विमोचन मुख्यमंत्री देवेन्द्र फडणवीस यांच्या हस्ते आज दीक्षाभूमीवरील सभागृहात आयोजित एका कार्यक्रमात करण्यात आले. यावेळी  पालकमंत्री राजकुमार बडोले,उर्जामंत्री चंद्रशेखर बावनकुळे, मुख्य सचिव स्वाधीन क्षत्रीय,मुख्यमंत्र्यांचे प्रधान सचिव प्रविण परदेशी,पाणी पुरवठा  विभागाचे प्रधान सचिव राजेश कुमार,उर्जा विभागाचे प्रधान सचिव विपीन श्रीमाळी, सामाजीक न्याय विभागाचे प्रधान सचिव सुरेंदकुमार बागडे,ग्रामविकास सचिव असीम गुप्ता, जलसंधारण सचिव डॉ. पुरूषोत्तम भापकर, कृषी आयूक्त विकास देशमुख,जमाबंदी आयुक्त एस पी कडू पाटिल, विभागीय आयुक्त अनुप कुमार, मनरेगा आयुक्त अभय महाजन यांची प्रमुख उपस्थिती होती.

सदर माहितीपट माहिती व जनसंपर्क महासंचालनालयाचे नागपूर-अमरावती नागपूरचे संचालक मोहन राठोड यांनी तयार केला आहे. कौशल्ययुक्त महाराष्ट्र या माहितीपटात प्रमोद महाजन कौशल्य विकास अभियान या योजनेचे यश मांडण्यात आले असून कौशल्ययुक्त महाराष्ट्र रोजगार युक्त विदर्भातून विदर्भातील उद्योजकांना पुढाकार घेण्याचे मुख्यमंत्री फडणवीस यांनी केलेले आवाहन, नक्षलग्रस्त गडचिरोली व गोंदियातील युवकांना रोजगार आणि स्वंरोजगार मिळवून देण्यासाठी कौशल्य विकास अभियानाने मारलेली बाजी ,कौशल्य विकास प्रशिक्षअंतर्गत लाभार्थ्यांना मिळणारे प्रशिक्षण रोजगार मेळावे,महिलांचा कौशल्य विकास यातून महिलांचे होत असलेले सबलीकरण याचे प्रतिबिंब या माहितीपटात उमटले आहे. या माहितीपटाच्या विमोचन प्रसंगी नागपूर विभागातील सर्व जिल्हाधिकारी, मुख्य कार्यकारी अधिकारी यांच्यासह अनेक विभागांच्या अधिकाऱ्यांची मोठया संख्येने  उपस्थिती होती.

00000