मुंबई, दि.29 : महाराष्ट्र शासनाच्या सामाजिक न्याय विभागाच्यावतीने ऍस्कॉप संस्थेच्या संयुक्त विद्यमाने ज्येष्ठ नागरिक दिनानिमित्त"ज्येष्ठोत्सव-2018" या कार्यक्रमाचे आयोजन सोमवार दि.1 ऑक्टोबर रोजी सकाळी 9:30 वाजता शुभारंभ लॉन्स, डी.पी. रोड, म्हात्रे पुलाजवळ, एरंडवणे, पुणे येथे करण्यात आले आहे.
राज्याचे सामाजिक न्याय व विशेष सहाय्य मंत्री राजकुमार बडोले यांच्या अध्यक्षतेखाली व पुण्याचे पालकमंत्री तथा अन्न व नागरी पुरवठा मंत्री गिरीष बापट तसेच सामाजिक न्याय व विशेष सहाय्य विभागाचे राज्यमंत्री दिलीप कांबळे, जलसंपदा राज्यमंत्री विजय शिवतारे यांच्या प्रमुख उपस्थितीत या कार्यक्रमाचे आयोजन करण्यात येत आहे. खासदार अनिल शिरोळे, स्थानिक आमदार प्रा. मेधाताई कुलकर्णी, पुणे जिल्हयातील खासदार, आमदार व लोकप्रतिनिधी या कार्यक्रमास उपस्थित राहणार आहेत.
यावेळी विविध क्षेत्रातील उल्लेखनीय कामगिरी करणाऱ्या ज्येष्ठ नागरिकांचा सन्मान करण्यात येणार आहे. त्यामध्ये, शां.ग. महाजन, अभिनंदन थोरात, प्रतिभा शाहू मोडक,माधव वझे, सुधीर गाडगीळ, विश्वास मेहंदळे, डॉ. मोहन आगाशे, माजी एअर चीफ मार्शल श्री. भूषण गोखले, ज्येष्ठ अभिनेत्री दीपा लागू, ज्येष्ठ लेखिका अरुणा ढेरे आदींचा सन्मान करण्यात येणार आहे.
ज्येष्ठ नागरिकांसाठी आयोजित केलेल्या विविध स्पर्धांमधील विजेत्यांना पारितोषिक वितरण, विनामुल्य आरोग्य तपासणी शिबिर, बचत गटांनी तयार केलेल्या वस्तूंचे प्रदर्शन व विक्री तसेच करमणुकीच्या कार्यक्रमाचे आयोजन करण्यात आले आहे. या कार्यक्रमाचा जास्तीत जास्त ज्येष्ठ नागरिकांनी लाभ घ्यावा, असे आवाहन सामाजिक न्याय व विशेष सहाय्य विभागाच्यावतीने करण्यात आले आहे.
००००
No comments:
Post a Comment