मुंबई, दि. 30 : राज्यातील आजी, माजी सैनिकांच्या कल्याणासाठी, योजनांच्या अंमलबजावणीसाठी तसेच त्यांच्या सन्मानासाठी शासन कटिबद्ध आहे, असे माजी सैनिक कल्याण मंत्री संभाजी पाटील- निलंगेकर यांनी आज विधान परिषदेत सांगितले.
सदस्य सतेज उर्फ बंटी पाटील यांनी या संदर्भात लक्षवेधी उपस्थित केली होती. या प्रश्नांच्या संदर्भाने उपस्थित झालेल्या चर्चेत उपस्थित झालेल्या प्रश्नांना, ग्रामविकास मंत्री पंकजा मुंडे, नगरविकास राज्यमंत्री डॉ. रणजीत पाटील यांनी उत्तर दिले.
श्री. निलंगेकर -पाटील आपल्या उत्तरात म्हणाले, राज्यात जिल्हा माजी सैनिक कल्याण अधिकाऱ्यांची 34 पदे मंजूर आहेत. या मंजूर पदांपैकी 16 पदे भरलेली आहेत. सेवा प्रवेश नियमानुसार अधिकारी उपलब्ध होऊ न शकल्यामुळे कार्यरत जिल्हा सैनिक कल्याण अधिकाऱ्यांना अतिरिक्त कार्यभार देण्यात आला आहे. युद्धात धारातीर्थ पडलेल्या सैनिकांना देण्यात येणारी रक्कम वाढवून 25 लाख वाढविण्यात आली आहे. ही रक्कम 48 तासांच्या आत सन्मानाने परिवारास सुपुर्द करण्याचे आदेश देण्यात आलेआहेत. त्याचप्रमाणे विर पत्नी विधवांना मिळणारे तीन हजार रुपयांचे पेंशन वाढवून सहा हजार करण्यात येणार आहे. माजी सैनिकांच्या वाहनांना टोल माफी मिळावी यासाठी शासन सकारात्मक असून बांधकाम विभागाकडे याचा पाठपुरावा करण्यात येईल असेही त्यांनी सांगितले.
माजी सैनिकांना घर टॅक्स मध्ये सवलत देण्यात यावी यासाठीच्या मागणीसाठी सर्व जिल्हा परिषदांनी विचार करावा तसेच ग्रामसभेत ठराव घेण्यात यावा, यासाठी ग्रामविकास मंत्री पंकजा मुंडे यांनी सांगितले.
***
No comments:
Post a Comment