आदर्श आचारसंहितेची प्रभावी अंमलबजावणी सुरु - अश्विन मुदगल

* 3 हजार 948 फ्लेक्स, दीड हजार बॅनर्स, एक हजार पोस्टर्स काढले

* विधानसभा मतदारसंघनिहाय विशेष पथके तैनात

* आदर्श आचार संहितेच्या अंमलबजावणीसाठी सहकार्य करा

नागपूर, दि. 14:  लोकसभेच्या सार्वत्रिक निवडणुकीसाठी रामटेक व नागपूर लोकसभा मतदारसंघात आदर्श आचार संहितेचा भंग होणार नाही यासाठी विधानसभा मतदारसंघनिहाय जिल्ह्यात 48 फ्लाईंग स्कॉड तसेच 36 चेकपोस्ट तैनात करण्यात आले आहेत. आचार संहितेच्या प्रभावी अंमलबजावणी करताना सुमारे 5 हजार 400 फ्लेक्स व बॅनर्स काढण्यात आले असल्याची माहिती जिल्हा निवडणूक अधिकारी तथा जिल्हाधिकारी अश्विन मुदगल यांनी दिली.

लोकसभेच्या रामटेक व नागपूर लोकसभा मतदारसंघात पारदर्शकपणे निवडणुका पार पाडताना आदर्श आचार संहितेचा भंग होवू नये यासाठी जिल्हास्तरावर आचार संहिता कक्ष तयार करण्यात आला आहे. या कक्षामध्ये विधानसभा मतदार संघनिहाय दररोज आचार संहितेसंदर्भातील सर्व तक्रारींची तात्काळ दखल घेण्यात येत असून फ्लाईंग स्कॉड तसेच चेकपोस्टच्या माध्यमातूनही संपूर्ण जिल्ह्यात 24 तास अंमलबजावणी सुरु करण्यात आली आहे. प्रत्येक विधानसभा मतदारसंघनिहाय चार फ्लाईंग स्कॉड व तीन चेकपोस्ट तैनात करण्यात आले असल्याची माहिती जिल्हाधिकारी अश्विन मुदगल यांनी दिली.

निवडणूक आयोगाने सार्वत्रिक निवडणुकीची घोषणा करताच जिल्ह्यात आदर्श आचार संहिता सुरु झाली आहे. त्यानंतर  जिल्हा प्रशासनाने 10- नागपूर लोकसभा मतदारसंघातील विविध ठिकाणचे 148 पोस्टर्स, 325 बॅनर्स, 2 हजार 417 फ्लेक्स तसेच 74 भिंती पत्रके काढण्यात आली आहेत. तसेच रामटेक मतदारसंघात विविध ठिकाणची 943 पोस्टर्स, एक हजार 176 बॅनर्स, एक हजार 531 फ्लेक्स तसेच 140 भिंतीपत्रके काढण्यात आली आहेत. जिल्ह्यात नागपूर व रामटेक लोकसभा मतदार संघात आदर्श आचार संहिता लागू झाली असल्यामुळे आचार संहितेचा भंग होणार नाही यासाठी सहकार्य करावे, असे आवाहन जिल्हा निवडणूक अधिकारी अश्विन मुदगल यांनी केले आहे.

*****