प्रधानमंत्री मुद्रा लोन योजना प्रभावीपणे राबवावी - केंद्रीय वित्त राज्यमंत्री मेघवाल

• 24 राष्ट्रीयकृत बॅकांच्या माध्यमातून लोन अर्जाचे रजिस्ट्रेशन
• वित्तीय साक्षरता प्रगतीपथावर
• 6 हजार 491 गरजूंना प्रधानमंत्री मुद्रा लोनचे वाटप

चंद्रपूर दि.19- समाजातील  सर्व सामान्य, पारंपारिक व्यवसाय  करणाऱ्या माणसांना व्यवसायासाठी  सावकाराकडे हात पसरावा लागु नये यासाठी केंद्र शासनाने  प्रधानमंत्री मुद्रा लोन योजनेच्या माध्यमातून  राष्ट्रीयकृत बँकांच्या सहकार्याने  गरजूंना मोठया प्रमाणात लोन  उपलब्ध करून दयावे अशा सूचना केंद्रीय वित्त राज्य मंत्री अर्जुनराम मेघवाल यांनी आज केले आहे.

चंद्रपूर येथील चांदा क्लब मैदानावर आज प्रधानमंत्री नरेंद्र मोदी यांचा रोजगार व स्वयं रोजगार संकल्प, राष्ट्रीयकृत बँका व विविध शासकीय संस्थांच्या सहकाऱ्याने प्रधानमंत्री मुद्रा लोन योजनाचा  भव्य लोन मेळावा व  चर्चा सत्राचे आयोजन करण्यात आले होते. या मेळाव्याचे दिपप्रज्वलन करुन  केंद्रींय वित्त राज्य मंत्री अर्जुनराम मेघवाल यांनी  उदघाटन केले. यावेळी कार्यक्रमाचे अध्यक्ष केंद्रीय गृह राज्यमंत्री हंसराज अहिर हे होते.

प्रमुख पाहुणे  खासदार डॉ. विकास महात्मे, महापौर राखी कंचर्लावार, आमदार नानाभाऊ शामकुळे, आ. ॲड संजय धोटे, माजी मंत्री संजय देवतळे, महाराष्ट्र वन विकास महामंडळाचे अध्यक्ष चंदनसिंह चंदेल, माजी आमदार जैनुद्दीन जवेरी, जिल्हाधिकारी आशुतोष सलिल, जिल्हा मध्यवत्ती सहकारी बँकेचे अध्यक्ष मनोहर पाऊनकर, विजय राऊत आदि मान्यवर उपस्थित होते.

प्रधानमंत्री मुद्रा लोन वाटप मेळाव्यात केंद्रीय वित्त राज्यमंत्री अर्जुनराम मेघवाल म्हणालेकी, देशात वित्तीय साक्षरता धिरे धिरे पुढे चालली आहे. चंद्रपूर येथे राज्यमंत्री हंसराज अहिर यांनी प्रधानमंत्री मुद्रा लोन मेळाव्याचे एवढे उत्कृष्ट नियोजन करून त्यांनी वित्त विभागाचे काम सोपे केले असून मी त्यांचे प्रथम अभिनंदन करतो असेही यांनी त्यावेळी सांगितले.

वित्त राज्यमंत्री मेघवाल पुढे म्हणाले की लहान मोठया व्यवसायासाठी  गरजू लोकांना ज्या बँकांनी लोन दिले त्यांचा सन्मान करावा व ज्या बँकांनी लोन दिले नाही व लोन देण्यासाठी  टाळा टाळ करत आहे अशा बॅकांना लोन देण्यासाठी प्रवृत्त करण्यात येईलअसेही त्यांनी सांगीतले. ते पुढे म्हणाले की गरिब कष्टकरी माणसाला लोन देण्याचे बँका टाळतात या लोनची परतफेड  होईल का नाही अशी भिती बँकांना वाटते परंतु गरीब माणूस लोन वेळेवर फेडतो याची  हमी प्रधानमंत्री नरेंद्र मोदी यांनी घेतली आहे. त्यामुळे बँकांनी  पारंपारिक व्यावसायिकांना  लोन देतांना जामीनदाराची  गरज भासणार नाही असेही त्यांनी सांगीतले.

ते पुढे म्हणाले की मुद्रा लोन योजनेतुन तीन  प्रकारचे लोन दिले जाते. शिशु लोन साठी 50 हाजार पर्यंत, किसान लोन साठी 50 हजार ते 5 लाखापर्यंत, तर तरुण लोन साठी 5 ते 10 लाखापर्यंत लोन  दिले जाते.आज देशातील पारंपारिक व्यवसाय करणा-या  1 कोटी 16 लाख लोकांना 45 हजार 514 कोटी  रुपयांचे लोन वाटप करण्यात आले आहे. असे त्यांनी सांगीतले.  प्रधानमंत्री मुद्रा लोन योजनेत कृषी  लोनचा समावेश करण्यात आला असून भविष्यात शहरी जनतेलाही लोनसाठी  सहभागी केले जाईल.

उपस्थित  विद्यार्थ्यांना मार्गदर्शन करतांना म्हणाले की  विद्यार्थी ते देशाचे भवीतव्य  असून  विद्यार्थ्याना  जीवन जगतांना  अनेक संघर्ष येतात त्यावर  मात करण्यासाठी आपण संघर्ष सूरू ठेवावे व चांगले नागरिक बनून या देशाची सेवा करावी  असेही  आवाहन  त्यांनी विद्यार्थ्याना केले.

कार्यक्रमाचे अध्यक्ष केंद्रीय गृह राज्यमंत्री हंसराज अहिर मार्गदर्शन करतांना म्हणाले की पंतप्रधान नरेंद्र मोदी यांची प्रधान मंत्री मुद्रा लोन ही महत्वकांशी योजना आहे. प्रधानमंत्र्यांनी सर्व सामान्य , कष्टकारी जनतेची  गरज  ओळखून  ही योजना सूरू केली आहे. योजनेचा लाभ पारंपारीक व्यवसाय करणाऱ्या सर्व जनतेला व्हावा असे स्वप्न त्यांनी  पाहिले असून त्याची पुर्त्तता आपल्याला अधिकाधिक गरजूंना बॅकांच्या सहाय्याने लोन मंजूर करुन करावयाची  आहे.

ते पुढे म्हणाले की शेतकऱ्यांनी शेतीबरोबरच शेतीपुरक जोडधंदा करणे आवश्यक आहे. जिल्हातील 24 बँकांनी 6 हजार 491 गरजू लाभार्थ्यांना लोन उपलब्ध करून दिले. त्यात 4 हजार 335 शिशु  लोन, 1 हजार 778 लोकांना किशोर लोन तर 378 लोकांना तरूण लोन दिले आहे असे त्यांनी सांगितले.

हंसराज अहिर पुढे म्हणाले की  प्रधानमंत्री मुद्रा लोन योजनेचा समाजातील गरिबातील गरिब माणसाला लाभ व्हावा यासाठी या मेळाव्याचे आयोजन केले असून प्रधानमंत्री नरेंद्र मोदी यांनी प्रधानमंत्री मुद्रा योजनेसाठी  1 लाख 80 हजार कोटी रूपयांचे लोन  विविध पारंपारिक व्यवसाय करणा-या गरीब माणसाला  बँकांच्या मार्फत कर्ज वितरण करण्याचे धोरण असून या कर्जाच्या माध्यमातून देशातील तरूण, बेरोजगार, पारंपारीक व्यवसायीक  स्वयंरोजगाराच्या माध्यमातून स्वावलंबी होतील असेही त्यांनी सांगितले.

प्रारंभी  केंद्रिय वित्त राज्यमंत्री अर्जुनराम मेघवाल, केंद्रिय गृह राज्यमंत्री हंसराज अहिर यांच्या हस्ते  पारंपारिक व्यवसासीकांना कर्जाचे धनादेश  वितरण करण्यात आहे. यावेळी खा. विकास महात्मे व महापौर राखी कंचर्लावार यांचे समयोचीत भाषण झाले.

या मेळाव्यात विविध राष्ट्रीयकृत 24 बँकांचे लोन मेळाव्यासाठी स्टॉल लावण्यात आले असून पारंपारिक व्यावसायीकांकडून लोनसाठी  अर्ज भरुन घेण्यात  आले. यावेळी विविध बॅकांच्या अधिका-यांनी लोन घेण्यासाठी उपस्थितांना मार्गदर्शन केले.

या वेळी आ. नानाभाऊ शामकुळे यांनी प्रास्तावीक केले  तर आभार राजेश मुन यांनी मानले तर कार्यक्रमाचे सुत्र संचालन नासीर खान यांनी केले. मेळाव्यात पारंपारीक व्यवसायीक कारागिर सर्व सामान्य नागरिक व विद्याथी महिला व्यवसायीक मोठया संख्येने उपस्थित होते.

000