दक्षता जनजागृती सप्ताह 4 नोव्हेंबरपर्यंत

मुंबई, दि. 1 :दक्षता जनजागृती सप्ताहानिमित्ताने 30 ऑक्टोबरपासून विविध कार्यक्रम शासनाच्या सर्व विभागांमध्ये सुरु आहेत. हे कार्यक्रम 4 नोव्हेंबरपर्यंत आयोजित करण्यात आले आहेत. याबाबतचे परिपत्रक सामान्य प्रशासन विभागाने काढले आहे.

           राज्य शासनाचे सर्व विभाग व त्याच्या नियंत्रणाखालील सर्व विभागप्रमुख, कार्यालयप्रमुख, राज्य शासनाचे अंगिकृत उपक्रम, सहकारी संस्था, स्वायत्त संस्थांमार्फत सप्ताहाचे आयोजन करण्याच्या सूचना देण्यात आल्या आहेत. याअंतर्गत कार्यालयाच्या दर्शनी भागात व मोक्याच्या ठिकाणी भित्तीपत्रक, कापडी फलक लावण्याच्या सूचना देण्यात आल्या आहेत. कार्यालये, शाळा, महाविद्यालयांमध्ये भ्रष्टाचाराच्या दुष्परिणामांवर प्रकाश टाकण्यासाठी चर्चासत्रे, वादविवाद स्पर्धा, व्याख्याने, निबंधस्पर्धा, कार्यशाळांचे आयोजन करण्यात येत आहे.

           या सप्ताहाच्या अनुषंगाने विशेष पुस्तिका प्रकाशन करण्याच्या सूचना देण्यात आल्या आहेत. राज्यातील अशासकीय संस्था, स्वयंसेवी संस्था, सामान्य नागरिक यांना दक्षता जनजागृती मोहिमेत सहभागी होण्याचे आवाहन करण्यात येत आहे. केंद्रीय दक्षता आयोगाच्या www.cvc.nic.in या संकेतस्थळावर उपलब्ध साहित्याचा जनतेमध्ये वितरणासाठी उपयोग करण्याच्या सूचना सर्व कार्यालयांना या सप्ताहाच्या निमित्ताने देण्यात आल्या आहेत.

००००