काव्यवाचनाचा कार्यक्रम प्रत्येक जिल्ह्यात व्हावा - मराठी भाषा मंत्री विनोद तावडे

विधिमंडळ पत्रकार कक्षात काव्यमैफल

        मुंबई, दि. 27 : मराठी भाषा गौरव दिनानिमित्त वि.वा.शिरवाडकर (कुसुमाग्रज) यांच्या ‘विशाखा’ या काव्यसंग्रह वाचनाचा कार्यक्रम प्रत्येक जिल्ह्यातील पत्रकार संघानी राबवावा, अशी अपेक्षा मराठी भाषा मंत्री विनोद तावडे यांनी आज केले. यावेळी विविध वृत्तपत्र आणि वाहिण्यांतील पत्रकारांनी केलेल्या कुसुमाग्रजांच्या कविता वाचनाने काव्यमैफल रंगली.

            विधानभवनातील विधिमंडळ पत्रकार कक्षात आज मंत्रालय व विधिमंडळ वार्ताहर संघ आणि वि.स.पागे प्रशिक्षण केंद्र यांच्या संयुक्त विद्यमाने कुसुमाग्रजांच्या काव्यवाचनाचा कार्यक्रम आयोजित करण्यात आला होता. त्यावेळी श्री.तावडे बोलत होते. या कार्यक्रमास आमदार हेमंत टकले, विधिमंडळ सचिवालयाचे जनसंपर्क अधिकारी निलेश मदाने, मंत्रालय व विधिमंडळ वार्ताहर संघाचे अध्यक्ष दिलीप सपाटे, श्यामसुंदर सोन्नर महाराज आणि पत्रकार मोठ्या संख्येने उपस्थित होते.

            मराठी भाषा गौरव दिनी कुसुमाग्रज यांच्या कविता वाचनाचा हा अत्यंत चांगला उपक्रम असून या उपक्रमाचा प्रत्येक जिल्ह्यातील पत्रकार संघाने आदर्श घ्यावा, असेही श्री. तावडे यावेळी म्हणाले.

            यावेळी विधीमंडळ वार्ताहर संघाच्या सदस्य आणि इतर पत्रकारांनी काव्यमैफलीत सहभाग घेतला.

अन्‌ मराठी भाषा मंत्री निवेदक झाले...

            मराठी भाषा गौरव दिनानिमित्त आयोजित या कार्यक्रमात कुसुमाग्रजांच्या ‘विशाखा’ काव्यसंग्रहाच्या प्रस्तावनेचे वाचन सुरु असताना मराठी भाषा मंत्री श्री.तावडे यांनी आवर्जून निवेदकाची भूमिका घेत प्रस्तावनेचे वाचन सुरु केले.

000