मुंबई, दि. 28 : चीनमधील युनान प्रांताच्या सीपीसीसीच्या चेअरमन ली जिंग यांनी शिष्टमंडळासह आज विधानपरिषदेचे सभापती रामराजे नाईक-निंबाळकर व विधानसभा अध्यक्ष हरिभाऊ बागडे यांची भेट घेतली. महाराष्ट्र व युनान प्रांतामध्ये व्यापारी व सांस्कृतिक संबंध दृढ व्हावेत, अशी यावेळी इच्छा व्यक्त केली.
श्रीमती जिंग यांच्यासह चीनचे मुंबईतील वाणिज्य दूत टँग गौकाई, सीपीसीसीच्या युनान प्रांताचे संशोधन अधिकारी टॅन यायूयान, परराष्ट्र कार्यालयातील उपमहासंचालक हाऊ कॉन, सांस्कृतिक व ऐतिहासिक दस्तावेज समितीचे हुंग लिक्सिन, उपाध्यक्षा वांग हुईपिंग, सदस्य झांग जुइंज, लि लि आदींचा शिष्टमंडळात समावेश होता. यावेळी संसदीय कार्यमंत्री गिरीष बापट, आमदार शरद रणपिसे, निलम गोऱ्हे, विधिमंडळाचे प्रधान सचिव डॉ. अनंत कळसे, उपसचिव विलास आठवले आदी यावेळी उपस्थित होते.
विधिमंडळाच्या कामकाजाबद्दल माहिती देऊन श्री. नाईक निंबाळकर म्हणाले, चीनमधील युनान प्रांत हा भारताला लागून आहे. महाराष्ट्र व युनान प्रांतात सांस्कृतिक, पर्यटन क्षेत्रात देवाणघेवाण व्हावी. तसेच राज्यात चित्रपट क्षेत्र मोठ्या प्रमाणात आहे. या क्षेत्रातही दोन्ही प्रांतात सहकार्य होईल.
श्रीमती जिंग म्हणाल्या, महाराष्ट्र हे भारतातील प्रगतीशील राज्य आहे. महाराष्ट्र व मुंबईचा देशाच्या विकासात मोलाचा वाटा आहे. आर्थिक बरोबरच कला, सांस्कृतिक क्षेत्रातही राज्य अग्रेसर आहे. त्यामुळे महाराष्ट्रात गुंतवणूक करण्यास युनान प्रांत उत्सुक आहे. तसेच पुढील वर्षी युनान प्रांतात होणाऱ्या जागतिक व्यापार व गुंतवणूक परिषदेत महाराष्ट्राने सहभागी व्हावे.
आमदार श्रीमती गोऱ्हे व श्री. रणपिसे यांनी चीन दौऱ्यातील आठवणी सांगितल्या. यावेळी शिष्टमंडळाने सभागृहाच्या अतिथी कक्षात उपस्थित राहून कामकाज पाहिले.
०००
No comments:
Post a Comment