अटल आरोग्य वाहिनीच्या माध्यमातून आश्रम शाळेतील विद्यार्थ्यांना आरोग्य सुविधा -चंद्रशेखर बावनकुळे

* दोन सुसज्ज रुग्णवाहिका आश्रम शाळांच्या सेवेत

* जिल्ह्यातील पाच हजार विद्यार्थ्यांना सुविधेचा लाभ

* आश्रम शाळेत  चोवीस तास आरोग्य सुविधा

नागपूर दि. 3 : आश्रम शाळेतील विद्यार्थ्यांना शिक्षणासोबत अटल आरोग्य वाहिनीच्या माध्यमातून चोवीस तास आरोग्य सुविधा उपलब्ध करुन देण्याच्या महत्त्वाकांक्षी योजनेंतर्गत दोन सुसज्ज रुग्णवाहिका दोन डॉक्टर व आरोग्य सेवकांसह चोवीस  तास उपलब्ध राहणार असल्याची माहिती पालकमंत्री चंद्रशेखर बावनकुळे यांनी दिली.

आदिवासी विकास विभागातर्फे दोन रुग्णवाहिका बेसिक लाईफ सपोर्टसह उपलब्ध झाल्या असून या रुग्णवाहिका जिल्ह्यातील कवडस (हिंगणा) व बेलदा (रामटेक) येथे चोवीस तास उपलब्ध राहणार आहेत. या रुग्णवाहिकेला पालकमंत्री चंद्रशेखर बावनकुळे यांनी हिरवी झेंडी दाखविल्यानंतर आदिवासी आश्रम शाळांसाठी रवाना झाल्यात. जिल्हाधिकारी कार्यालयाच्या परिसरात आयोजित या कार्यक्रमात महापौर नंदाताई जिचकार, जिल्हाधिकारी अश्विन मुदगल, आदिवासी विभागाचे अपर आयुक्त ऋषिकेश मोडक, मुख्य कार्यपालन अधिकारी, अंकुश केदार, अपर आयुक्त मिलिंद खडसे, प्रकल्प अधिकारी दिगंबर चव्हाण आदी उपस्थित होते.

आदिवासी विकास विभागाच्या आश्रम शाळा व एकलव्य आदर्श निवासी शाळांमध्ये विद्यार्थ्यांच्या आरोग्याची संपूर्ण काळजी घेण्यासाठी मुख्यमंत्री देवेंद्र फडणवीस यांच्या सूचनेनुसार अटल आरोग्य वाहिनी, आदिवासी जीवनदायिनी या योजनेंतर्गत सुसज्ज अशा रुग्णवाहिका उपलब्ध करुन देण्यात येत असल्याचे सांगताना पालकमंत्री चंद्रशेखर बावनकुळे म्हणाले की, आश्रम शाळातील सर्व विद्यार्थ्यांच्या आरोग्याची  नियमित काळजी घेण्याबरोबरच दुर्गम भागात असलेल्या या शाळांतील विद्यार्थ्यांना आपत्कालिन परिस्थितीत  तातडीने उपचार मिळण्यासाठी रुग्णवाहिकांची  व्यवस्था करण्यात आली आहे.

आश्रम शाळांतील विद्यार्थ्यांचे नियमित आरोग्य तपासणी, साथीच्या रोगांवर तातडीने उपचार तसेच आवश्यक औषधे व इंजेक्शन आदी सुविधांसोबतच प्रत्येक विद्यार्थ्यांचे डिजिटल हेल्थकार्ड तयार करण्यात येणार आहे. त्यावर विद्यार्थ्यांच्या आरोग्याची संपूर्ण माहिती राहणार आहे.

प्रारंभी आदिवासी विभागाचे अपर आयुक्त ऋषिकेश मोडक यांनी स्वागत करुन आश्रम शाळांमधील विद्यार्थ्यांसाठी अटल आरोग्य वाहिनी योजनेच्या माध्यमातून आरोग्य सुविधा या उपक्रमाची माहिती दिली. पालकमंत्री चंद्रशेखर बावनकुळे यांनी रुग्णवाहिकेतील बेसिक लाईफ सपोर्ट तसेच व्हेंटिलेटर  आदी सुविधांची पाहणी केली. त्यानंतर रुग्णवाहिकांना हिरवी झेंडी दाखवून आश्रम शाळांसाठी रवाना केल्या. यावेळी आदिवासी विभागाचे वरिष्ठ अधिकारी उपस्थित होते. 

                                                                                    *****