जागतिक संत्रा महोत्सवाच्या माध्यमातून नागपूरच्या संत्र्याला नवी ओळख मिळणार -चंद्रशेखर बावनकुळे

* राज्यस्तरीय महोत्सव म्हणून संत्रा फेस्टिवलचे आयोजन

* दिनांक 19 ते 21 जानेवारी दरम्यान भव्य आयोजन

* संत्रा कार्निव्हलसह विविध उपक्रमात नागपूरकरांचा सहभाग

* आंतरराष्ट्रीय स्तरावर संत्र्याचे ब्रॅण्डिंग

* संत्रा उत्पादक व उद्योजकांना व्यासपीठ

नागपूर दि. 3 : नागपूरच्या संत्र्याला जागतिक व्यासपीठ मिळवून देताना संत्रा उत्पादक शेतकऱ्यांना नवीन विकसित तंत्रज्ञानाची माहिती, संत्रा या फळाला बाजारपेठेसोबत प्रक्रिया उद्योगाला चालना देण्यासाठी जागतिक संत्रा महोत्सवाचे आयोजन करण्यात येत असून राष्ट्रीय व आंतरराष्ट्रीय स्तरावरील तंत्रज्ञानाची माहिती या महोत्सवाच्या माध्यमातून उपलब्ध होणार असल्याची माहिती पालकमंत्री चंद्रशेखर बावनकुळे यांनी आज दिली.

जिल्हाधिकारी कार्यालयाच्या छत्रपती सभागृहात जागतिक संत्रा महोत्सव आयोजनासंदर्भात विविध संस्था, संत्रा उत्पादक तसेच वरिष्ठ शासकीय अधिकाऱ्यांची बैठक पालकमंत्री चंद्रशेखर बावनकुळे यांच्या अध्यक्षतेखाली आयोजित करण्यात आली होती. या बैठकीत महापौर नंदाताई जिचकार, जिल्हाधिकारी अश्विन मुदगल, महापालिकेचे अपर आयुक्त रविंद्र ठाकरे, उपजिल्हाधिकारी रविंद्र कुंभारे, महाऑरेंजचे श्रीधर ठाकरे, लोकमत समूहाचे निलेश सिंह, आशिष वानखेडे, कृषी सहसंचालक रविंद्र भोसले आदी अधिकारी तसेच विविध संस्थांचे प्रतिनिधी उपस्थित होते.

राज्यात विभागनिहाय प्रमुख सहा महोत्सव आयोजित करण्यात येणार असून या अंतर्गत नागपूर येथे  जागतिक संत्रा महोत्सवाचे आयोजन येत्या 19 ते 21 जानेवारी दरम्यान सुरेश भट सभागृहात करण्यात येणार आहे. या महोत्सवानिमित्त विविध उपक्रमाचे आयोजन होत असल्यामुळे या महोत्सवाचा लाभ संत्रा उत्पादक शेतकऱ्यांना होणार आहे. या महोत्सवात विविध देशांचे प्रतिनिधी उपस्थित राहून तेथील संत्रा उत्पादनासंदर्भातील तंत्रज्ञानाची माहिती राज्यातील शेतकऱ्यांना या महोत्सवाच्या माध्यमातून होणार आहे. तसेच देशाच्या विविध भागातील संत्रा उत्पादक संस्था व प्रक्रिया उद्योगाचे प्रतिनिधी सुद्धा या महोत्सवात निमंत्रित करण्यात आले आहे. संत्र्याचे ब्रॅण्डिंग आणि प्रमोशन करणे हा या महोत्सवाचा उद्देश आहे.

संत्रा महोत्सवाचे मागील वर्षी आयोजन करण्यात आले होते. त्याच धर्तीवर यावर्षी सुद्धा आयोजन करण्यात येणार असून या महोत्सवाच्या माध्यमातून  पर्यटकांना आकर्षित करणे. तसेच संत्रा उत्पादक शेतकऱ्यांना उत्पादनासोबतच विक्री व्यवस्थापनाची माहिती देण्यात येईल. यासाठी आवश्यक तांत्रिक ज्ञान देण्यासाठी शेतकऱ्यांना निमंत्रित करण्यात येणार आहे. संत्रा उत्पादक शेतकऱ्यांसाठी स्वतंत्र कार्यशाळेचे आयोजन करण्यात येणार असून कृषी विभागामार्फत आवश्यक सुविधा उपलब्ध करुन द्याव्यात, अशा सूचनाही पालकमंत्री चंद्रशेखर बावनकुळे यांनी दिल्या.

संत्रा महोत्सव आयोजनासाठी सर्व विभागांचा समन्वय राहावा यासाठी जिल्हास्तरावर नोडल अधिकाऱ्यांची नियुक्ती करावी व आयोजनासाठी महानगरपालिकेसह सर्व विभागांनी सहकार्य करावे,अशा सूचना यावेळी देण्यात आल्या.

महापौर नंदाताई जिचकार, जिल्हाधिकारी अश्विन मुदगल, अपर आयुक्त रविंद्र ठाकरे, महाऑरेंजचे श्रीधर ठाकरे आदींनी संत्रा महोत्सवाच्या आयोजनासंदर्भात यावेळी माहिती दिली. अनिरुद्ध हजारे यांनी सादरीकरणाद्वारे महोत्सवाच्या विविध उपक्रमाविषयी माहिती दिली.

                                                                          ****